2019年电影版《唐顿庄园》第一部勒国内上映个辰光，开开心心到电影院里看了一趟。观众大多数侪像我搿能，因为欢喜看英剧《唐顿庄园》，追光整整六季，当演员原班人马再杀进大银幕个辰光，熬勿牢“玛丽是否寻到新个爱情？”“格兰瑟姆伯爵保牢了唐顿庄园伐？”“楼下头个佣人伊拉哪能了？”，等等，牵记而去买票看电影。英伦风情、优雅古堡，大银幕拍出来，更加豪华锦绣，搿也是电影制片人瞄准“唐顿工程”个经济长尾巴效应。

　　2025年个《唐顿庄园：盛大终章》——《唐顿庄园》系列电影第三部仍然是群戏个样式。1930年玛丽离婚，勒上流社会成为众矢之的。玛丽个娘舅败光了玛丽姆妈个财产，唐顿庄园跌入了财务危机，格兰瑟姆伯爵终于让大囡儿当家，自家退居两线，但是，玛丽接管个唐顿庄园必须挂牌卖出去了……佣人也出现了四散个状态。为啥玛丽离婚带来个社交个痛苦，阿拉看得无动于衷？伊跟《安娜•卡列尼娜》里向安娜拨上流社会抛弃还勿一样。唐顿仍旧会得守护玛丽个一切。茶杯里向个风波忒苍白了，贵族个搿能样子个隔代。老钱跟老钱个传奇，已经让人吃力讨厌抛弃。迭个“终章”结束得明智。片中只有一只细节是有现实意义个。曾经是唐顿庄园驾驶员个三女婿汤姆，成为光棍创业以后，表示愿意拿拨卖脱汽车公司个钞票借拨原来个丈人解困，格兰瑟伯爵因为搿桩事体感动而受到了启发。

　　哪能介善待他人，也就是哪能善待自家。翻盘常庄是存在个。勒六集英剧《恶念》当中，年轻英俊个男保姆亚当，跟唐顿庄园里向个佣人勿一样。亚当读过大学，知识丰富，熟练运用资讯，带小人烧小菜，样样侪会得做。伊个东家夫妻，男个是风司老总，女个是时尚界个成功人士。一条挖空心思、骗得主人信任个毒蛇，是哪能介钻进一个有小囡个大家庭中心个？有钞票人家会得看得心惊肉跳。男主人个儿子吸毒拨警察捉得去，拨学堂开除了。有钞票个人家勒某一天拨抢劫精光。最后男主人搭上了性骚扰个麻烦，名誉扫地，走勿进自家创办了廿年个公司。就搿能样子，男保姆仍旧勿肯放过伊个性命。亚当个仇富并勿是盲目个。勒好多年前头，因为风司埃个老总抽脱投资，家族企业经营失败，亚当个爷竟然杀脱老婆以后再自杀。长大以后个儿子就拿蓄意报复作为自家个人生目标。

　　钞票当然勿可以保证家庭个安全。杀机马上就要到来个炫富，竟然有了一丝讥讽个味道。人首先有弱点，坏人再会得利用。富跟穷天大个悬殊可能制造悲剧。富人个自以为是搭仔神气活现，指手画脚，导演讽刺得勿露声色。凶杀悬疑个外壳包牢了黑色个喜剧。

　　因为主演《破•地狱》而出名个香港演员黄子华，勒电影《毒蛇律师》当中，扮演因为自家个轻率而使得女当事人拨误判个辩护律师。林大律师以满勿在乎个套路工作，以为是板赢个。伊也想巴结权贵，但并勿容易。事实个真相是入赘香港名门望族个钟医生，为了掩盖太太弄伤自家非婚生囡儿个罪责，亲手杀了小囡儿，却嫁祸于女小囡个姆妈、自家个情人。17年坐牢监服刑个冤案，强烈个震动了林律师个良心。

　　方言充满了亲和温柔个日常性，法庭浪最后翻案个埃场最后个对证，林律师有备而来，滔滔勿绝。越是温和个口气，揭露个真相越是残酷。明晓得大量失血忒多个人吃茶会得让人死脱，钟医生却喂了一瓶又一瓶拨囡儿。

　　“富有就享受特权？可以眼睛里向呒没法律？”“对面满满叫坐满了个一排律师，是为拨钟使眼色？㑚是否有羞耻心？”林律师个英勇抨击已经超过了律师个职业，伊完成了自家个救赎。毒舌个毒，震动了法庭。毒舌个舌，拿大家心目当中个公正重新牵出地平线。一面孔戆嗒嗒个钟医生也好，一面孔个傲气个钟太太也好，侪让人感叹：钞票制造牺牲品，钞票也制造了怪物。

　　“㑚讲个是买卖，阿拉讲个是继承。”搿是《唐顿庄园》玛丽大小姐个老有名个台词。继承永远是神话。“唐顿”勿再是时髦，时髦个是《白莲花度假村》埃能样子个剧，解构富人、讽刺富人。

　　迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

　　本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问。